Որքա՜ն հաճելի է ձմռանը կարտոֆիլ եփել և ուտել խրթխրթան թթու կամ մարինացված կաղամբով: Ի դեպ, վերջին տարբերակն ինձ ավելի շատ է դուր գալիս: Սովորական թթու կաղամբը համով զգալիորեն զիջում է մարինացված «Պրովանսալ»-ին:
Միակ բանը, որ պետք է հիշեք՝ Ձեզ հարկավոր չէ կաղամբը սեղմել ձեռքերով՝ աղ և շաքարավազ ցանելով: Այն պետք է մնա խրթխրթան:
Ինչ է պահանջվում.
1 կգ սպիտակ կաղամբ,
300 գ քաղցր կարմիր բուլղարական պղպեղ,
200 գ գազար,
2-3 պճեղ սխտոր,
100 մլ արևածաղկի ձեթ,
100 մլ ջուր,
20 մլ քացախ 9%,
50 գ շաքարավազ,
20 գ աղ:
Պատրաստումը.
Կաղամբը մանր կտրատեք դանակով կամ հատուկ քերիչով: Լցրեք հարմար ամանի մեջ, որտեղ այն մարինացվելու է:
Ավելացրեք աղ և շաքարավազ:
Խառնեք ձեռքերով, բայց ոչ շատ կոպիտ, որպեսզի կաղամբը չփափկի:
Մաքրեք, լվացեք գազարը, անցկացրեք քերիչով: Ավելացրեք կաղամբին:
Մաքրեք պղպեղը սերմերից և պոչերից, կտրեք փոքր շերտերով:
Սխտորը մամլեք, ավելացրեք ամանի մեջ: Լցրեք արևածաղկի ձեթ:
Այժմ ավելացրեք քացախ և խառնեք գդալով, այլևս պետք չէ կաղամբը ձեռքերով խառնել:
Վերջում մի փոքր տաք ջուր լցրեք (50-60 աստիճան): Խառնեք: Պետք է նրա վրա ծանրություն դնեք: Հարմար է պարզապես ծածկել ափսեով և դրա վրա տեղադրել մեկ բանկա ջուր:
Կաղամբը թողեք, որ մարինացվի սենյակային ջերմաստիճանում մոտ 3 ժամ, կամ կարող եք այն թողնել սառնարանում ամբողջ գիշեր:
Այժմ կարող եք թթու կաղամբը դնել ապակե տարաների մեջ և պահել սառնարանում մոտ 10 օր:
Պատրա՛ստ է: Մատուցելուց առաջ թարմ կանաչիներ շաղ տվեք: Բարի՜ ախորժակ:
Նյութը հրապարակման պատրաստեց՝ ՆՈՐ ԻՆՖՈ-ն