Վարչապետն ասաց գլխավորը. Նշանակումները մնում են իր հայեցողությանը
Երեկ հրաժարական տված վարչապետ Նիկոլ Փաշինյանը շարունակում է կատարել իր պարտականությունները եւ երեկ կարեւոր հայտարարություն է արել: Պատասխանելով հարցին, թե ինչ սկզբունքով են կատարվում նշանակումները կառավարությունում, եթե այլեւս չկա «յուրայինների ու օտարների» բաժանում, վարչապետի պաշտոնակատարն ասել է, որ ամեն ինչ թողնված է վարչապետի ու պատասխանատու մարմնի հայեցողությանը:
Նոր կառավարության անդամները ամռանը հանրությանը բաժանեցին սեւ ու սպիտակի՝ դրա վրա կառուցելով Երեւանի ավագանու ընտրությունների քարոզարշավը: Նիկոլ Փաշինյանը միանշանակ հայտարարում էր, որ որոշ կուսակցություններ արդեն պատմության աղբանոցում են, որ բոլորին ասֆալտին են փռելու, եւ սեւերն ապագա չունեն Հայաստանում:
Հիմա նա այլ բան է ասում, եւ հասարակությունում հարց է ծագում, թե ինչ սկզբունքով են նշանակվելու նոր կառավարության անդամները եւ ով մանդատ կստանա ապագա խորհրդարանում: Դա նո՞ւյնպես Փաշինյանի հայեցողությանն է թողնվելու:
Հիշեցնենք, որ այժմ տեղի է ունենում ընտրական օրենսգրքի փոփոխությունների քննարկումը, որով խորհրդարանում ներկայիս 3-ի փոխարեն առնվազն 4 ուժ պետք է լինի: Ենթադրվում է, որ Նիկոլ Փաշինյանի Քաղաքացիական պայմանագիրը կստանա ձայների 67%-ը, իսկ եթե Լույս դաշինքը ստանա 5-7%, ապա ԲՀԿ-ն կամ էլ մյուս կուսակցությունը տեսականորեն կարող են ստանալ մանդատների քառորդ մասը: Ահա թե ինչու է մտցվում չորս կուսակցությունների մասին կետը՝ որ մանդատների 33%-ը բաժանվի ոչ թե երկու, այլ երեք կուսակցությունների միջեւ:
Ո՞վ կարող է մտնել խորհրդարան: Ռոբերտ Քոչարյանը հայտարարել է, որ չի մասնակցելու ընտրություններին: ՀՀԿ պատգամավորների մի մասն ասում է, որ անպայման պետք է մասնակցել: Նրանք գտնում են, որ հնարավորություն ունեն ստանալ մանդատների փոքր մասը:
Ծառուկյան դաշինքը նույնպես մտադիր է ստանալ ընդդիմադիր մանդատները եւ հնարավոր է դառնալ Ռուսաստանի գործընկերը Հայաստանի խորհրդարանում: Ծառուկյանն օրերս Հայաստան էր հրավիրել «Միասնական Ռուսաստանի» պատվիրակությանը:
Ինչ վերաբերում է Դաշնակցությանը, ապա կուսակցությանը դժվար ժամանակներ են սպասվում ռեստարտի համար: Ժողովուրդ թերթը հայտնում է, որ ՀՅԴ-ն մտադիր է ժողով հրավիրել ու փոխել Հրանտ Մարգարյանին: ՀՅԴ-ն կրկի՞ն «սփյուռքյան» կուսակցություն կդառնա: Այս սցենարի իրական լինելու հնարավորության օգտին է խոսում այն, որ Նիկոլ Փաշինյանը Ֆրանսիայում հանդիպել է ՀՅԴ տեղի ղեկավարության հետ: Վերջերս էլ ՀՅԴ-Փաշինյան հանդիպմանը ներկա է եղել ՀՅԴ ֆրանսիական մարմնի պատասխանատուն:
Հիշեցնենք, որ Հայաստանում Լեւոն Տեր-Պետրոսյանի օրոք ՀՅԴ գործունեությունն արգելված էր եւ վերականգնվել է միայն Ռոբերտ Քոչարյանի իշխանության գալուց հետո: Կուսակցությունն ամբողջովին «հայաստանյան» դարձավ, երբ դրա ղեկավարությունն ու ֆինանսավորման աղբյուրները սփյուռքից Հայաստան տեղափոխվեցին:
Դա մի կողմից հնարավորություն տվեց ՀՅԴ-ն «մեկուսացնել» սփյուռքից, բայց մյուս կողմից թույլ տվեց ՀՅԴ ղեկավարությանն ազդել Հայաստանում քաղաքական կյանքի վրա եւ ստանալ քվոտաներ:
Հիմա այդ մոտիվացիաները չկան, եւ կուսակցությունը կարող է վերադառնալ համազգային մակարդակ՝ չսահմանափակվելով Հայաստանով: Ճիշտ է, կուսակցությունը հնարավոր է չկարողանա մասնակցել Հայաստանի ընտրություններին, բայց հնարավորություն կստանա դառնալ համահայկական ցանցային կառույց: Բայց երեւի դա էլ թողնվի Նիկոլ Փաշինյանի հայեցողությանը:
