Վարչապետ Նիկոլ Փաշինյանը կառավարության հունիսի 13-ի արտահերթ նիստին ՀՀ պաշտպանության նախարար Դավիթ Տոնոյանից հետաքրքրվեց, թե ինչպես են սկսվել Տավուշի ուղղությամբ հակառակորդի կողմից կրակոցները, ինչին ի պատասխան նախարարը նշեց․
«Երեկ՝ 12։30, մեր դիրքերից մեկին մոտենում է ՈՒԱԶ ավտոմեքենա, որն անհսականալի պատճառներով զինծառայողները դուրս են գալիս մեքենայից և շարժվում են դեպի մեր դիրքը։ Շատ կարևոր է, որ բոլորն իմանան․ դիրքը գտնվում է ՀՀ տարածքում, անմիջապես Հայաստանի Հանրապետության սահմանի վրա։ Քանի որ շարժումն անսպասելի էր մեր զինծառայողների համար, զինծառայողները վերադասին զեկուցելուց ստանում են հրահանգ՝ հաշվի առնելով հնարավոր ադրբեջանական զինծառայողների մոլորվածությունը կամ աշխարահագրության կամ օպերատիվ իրավիճակին չտիրապետելու պատճառով՝ կոչ են անում լքել տարածքը, որը և իրականացվում է։ Թողնելով ավտոմեքենան, ադրբեջանական զինծառայողները վերադառնում են իրենց դիրքերը։ Հետո սկսվում է 82 մմ ականանետներով հրետակոծություն՝ դեպի նույն դիրքը և մարտական խմբերի շարժ՝ էլի դեպի նույն դիրքը, որն էլ կասեցվել է հրետակոծությամբ և համապատասխան գործողություններով։ Հակառակորդը՝ կրելով կորուստներ՝ նահանջել է»,-ասաց նախարարը։
