Գործադիրն ընդունեց արտակարգ դրությունը մինչև մայիսի 14-ը երկարաձգելու նախագիծը․ այն կուղարկվի ԱԺ-ի հաստատմանը։
«Ինչո՞ւ է անհրաժեշտ արտակարգ դրության ռեժիմը շարունակել․ համաճարակային թվերի առումով, փառք Աստծո, անկառավարելի իրավիճակ չունենք, բայց պետք է արձանագրենք կարևոր ռիսկ՝ պարետատան որոշմամբ թույլատրելի տնտեսական գործունեության շրջանակն ընդլայնվել է՝ տնտեսական կյանքը չմեռցնելու ու սոցիալական իրավիճակն է՛լ ավելի չբարդացնելու համար։ Սա բերում է ռիսկի, որ թվերը կրկին կսկսեն աճել, եթե քաղաքացիներն ամենախիստ ձևով չպահպանեն իրենց անվտանգության կանոնները»,- կառավարության արտահերթ նիստում հայտարարեց վարչապետ Նիկոլ Փաշինյանը։
Նշենք, որ կառավարության՝ այսօր հրավիրած արտահերթ նիստի օրակարգում հետևյալ հարցերն են՝
1. Կորոնավիրուսի տնտեսական հետևանքների չեզոքացման տասնմեկերորդ միջոցառումը հաստատելու մասին նախագիծ։
2. Հայաստանի Հանրապետությունում 2020 թվականի մարտի 16-ին հայտարարված արտակարգ դրության ժամկետը երկարաձգելու և Հայաստանի Հանրապետության կառավարության 2020 թվականի մարտի 16-ի N 298-Ն որոշման մեջ փոփոխություններ և լրացում կատարելու մասին նախագիծ։
Վերջինով առաջարկվում է երկարաձգել Հայաստանի Հանրապետությունում 2020 թվականի մարտի 16-ին հայտարարված արտակարգ դրության ժամկետը 2020 թվականի ապրիլի 14-ից ժամը 17:00-ից` 30 օրով՝ մինչև 2020 թվականի մայիսի 14-ը ժամը 17:00-ն ներառյալ ժամկետով:
Աղբյուր՝ Մամուլ