«Հայաստանի կառավարության աշխատանքն այս օրերին չափազանց բարձր եմ գնահատում, անգամ արվում է ավելին, քան հնարավոր է: Ես շատ գոհ եմ:
Կարծում եմ, որ շատերն են հասկանում, թե նոր ընտրված, դեռ քիչ փորձով կառավարությունն ինչ փորձության առաջ է կանգնել: Ես հավատում եմ, որ լավ է լինելու, մենք կորոնավիրուսն էլ ենք հաղթելու, Աստված մեր ազգին, մեր ժողովրդին չի թողնի»,-«Ժողովուրդ» օրաթերթի հետ զրույցում իր տեսակետը ասեց երգչուհի Արմինե Գրիգորյանը:
Նա ընդգծեց, որ իր աշխատանքը ևս շատ տուժել է կորոնավիրուսի հետևանքով. «Չի աշխատում այն ռեստորանը, ուր հանդես էի գալիս, բացի այդ, ես օրավարձով աշխատող էի, հանդես էի գալիս տարբեր խնջույքներում, հետեւաբար այս համաճարակային օրերին կանգնել եմ փաստի առաջ: Սակայն, հավատացե՛ք, դա չէ, որ ինձ հուզում է:
Սրանք այնպիսի օրեր են, երբ աղոթում եմ ոչ միայն իմ, իմ ընտանիքի և Հայաստանի, այլ նաև ամբողջ աշխարհի համար»:
Արմինե Գրիգորյանը նշեց, որ նա օրինակելի քաղաքացի է. և եթե պարետը հորդորել է մնալ տանը, ինքը ենթարկվում է նրան: Հարցին, թե ինչ տպավորություն ունի քաղաքացիների ինքնակազմակերպման մասին, Արմինե Գրիգորյանը պատասխանեց.
«Մենք լեն օրերին իրար քննադատում ենք, նեղ օրերին՝ համահունչ ենք դառնում, միաբանվում ենք: Այս վերջինը տաղանդի պես բան է: Յուրաքանչյուր ազգ չէ, որ օժտված է դրանով: Անշուշտ, կան մարդիկ, որոնք այս օրերին միմիայն վատն են տեսնում և մատնանշում, իսկ ես լավատես եմ, ես այդ տեսակն եմ»:
